Қытайдың UBTECH Robotics компаниясы Қазақстанда робот техникасын өндіруді жоспарлап отыр. Компания Алматыда білім беру және қызмет көрсету салаларына арналған роботтар шығаратын өндіріс орнын ашпақ. Бұл жоба компанияның Қытайдан тыс жердегі алғашқы өндірісі болмақ, деп хабарлайды Tech-news. Мемлекет басшысы Қасым-Жомарт Тоқаев UBTECH Robotics-тің аға президенті Чжун Юнмен кездесіп, компанияның Қазақстандағы жоспарларын талқылады. Кездесуде робот техникасы саласындағы кадр даярлау мәселесіне де назар аударылды. UBTECH пен Қазақстанның техникалық жоғары оқу орындары және колледждері арасында тұрақты байланыс орнату ұсынылды. Сонымен қатар ортақ құзырет орталығын ашу мәселесі қаралды. Оның аясында қазақстандық мамандар компанияның зерттеу және жаңа өнімдер әзірлеу жұмыстарына қатыса алады. Роботтарды тек білім беру саласында емес, өндірісте де қолдану жоспарланып отыр. Атап айтқанда, UBTECH технологияларын Alatau City жобасына енгізу, сондай-ақ тау-кен, мұнай-газ және ірі логистикалық нысандарда роботтарды пайдалану мүмкіндігі талқыланды. Қазақстан мен UBTECH арасындағы ынтымақтастық робот техникасы мен жасанды интеллектіні дамыту жөніндегі келісіммен байланысты. Оған 2026 жылғы шілдеде Алматы әкімдігі, NERO Group және UBTECH Robotics арасында қол қойылған. Чжун Юн Қазақстандағы цифрландыру мен жасанды интеллектіні дамытуға бағытталған жұмыстарды атап өтіп, бірлескен жобалар үшін қалыптасқан технологиялық ортаны жоғары бағалады.