AI & Digital Bridge 2026 форумында банктердің жасанды интеллектті клиенттерге қызмет көрсетуден бастап тәуекелдерді басқаруға дейінгі бағыттарда қолдануы талқыланады. «Банк жүйесінің болашағы: AI, платформалар және жаңа қаржылық инфрақұрылым» сессиясына банк, финтех және төлем индустриясының сарапшылары қатысады, деп хабарлайды Tech-news. Қазақстанда банк қызметтерінің басым бөлігі цифрлық форматқа көшіп үлгерді. Ендігі кезең — жасанды интеллектті осы инфрақұрылымның ішкі процестеріне енгізу. AI клиенттерге қызмет көрсетуді автоматтандырумен қатар, кредиттік тәуекелді бағалау, алаяқтықты анықтау, деректерді талдау және операциялық процестерді оңтайландыру үшін де қолданылуы мүмкін. Алайда технологияны енгізу жылдамдығымен бірге деректердің сапасы, модельдердің сенімділігі және клиенттердің қаржылық ақпаратының қауіпсіздігі мәселесі де өзекті болып отыр. Осы тақырыптар 1–3 қазан аралығында Астанада өтетін AI & Digital Bridge 2026 форумындағы панельдік пікірталаста қарастырылады. Банктен технологиялық платформаға дейін Сессияға дәстүрлі банктер мен халықаралық финтех компанияларының өкілдері қатысады. Freedom Holding Corp. компаниясының Chief Banking Officer-ы және Freedom Bank Kazakhstan директорлар кеңесінің мүшесі Айдос Жұмағұлов қаржы саласында 20 жылдан астам тәжірибесі бар. Ол банктерді цифрландыру, стратегиялық трансформация және технологиялық даму бағыттарына жауап береді. Пікірталаста оның тәжірибесі дәстүрлі банктің цифрлық платформаға айналу процесін көрсетуге мүмкіндік береді. Ал Alpaca компаниясының тең құрылтайшысы әрі CEO-сы Йоши Йококава қаржы инфрақұрылымының басқа моделін таныстырады. Alpaca акциялар мен цифрлық активтермен сауда жасауға арналған API-инфрақұрылымын дамытады. API арқылы басқа компаниялар дайын технологиялық мүмкіндіктерді өз сервистеріне біріктіре алады. Йококава бұған дейін Lehman Brothers және Nomura компанияларында капитал нарықтары саласында жұмыс істеп, deep learning технологияларына қатысты жобаларға да қатысқан. AI енгізілген кезде деректердің рөлі артады Halyk Bank басқарма төрағасының орынбасары Михаил Хасин ірі қаржы ұйымының технологиялық архитектурасын жаңарту мәселесін ортаға шығарады. Оның IT саласындағы тәжірибесі 25 жылдан асады. Halyk Bank-ке дейін ол халықаралық қаржы ұйымдарында қызмет атқарып, BNP Paribas-та Global Markets CIO болған. Банк жүйесінде AI көбейген сайын деректерді басқару мен алгоритмдердің сапасы маңызды бола түседі. Бұл бағытта «Банк ЦентрКредит» банкінің деректерді басқару, AI және бөлшек тәуекелдерді басқару жөніндегі вице-президенті Рубина Лозовая жұмыс істейді. Оның жауапкершілік аймағына Data & Analytics, AI, клиенттік аналитика, кредиттік тәуекел және Data & AI Governance кіреді. Банк жасанды интеллектті клиенттерге қызмет көрсету, антифрод, сату және процестерді автоматтандыру бағыттарында пайдаланады. Панельге Mastercard компаниясының Шығыс Еуропадағы сервистік бизнесті дамыту жөніндегі аға вице-президенті Онур Доган да қатысады. Оның кәсіби тәжірибесі стратегиялық консалтинг пен цифрлық трансформация салаларымен байланысты. Қазақстанның қаржы инфрақұрылымы қалай өзгереді? Спикерлер банк саласындағы AI трансформациясының әртүрлі қырын қамтиды: банк цифрландыруы, финтех платформалары, технологиялық архитектура, деректерді басқару және тәуекелдерді бақылау. Пікірталасты АХҚО басқарушысы Ренат Бектуров жүргізеді. Ол бұған дейін Astana International Exchange компаниясын басқарған және Қазақстанның капитал нарығы мен инвестициялық инфрақұрылымын дамытуға қатысқан. Сондықтан талқылау тек банктердің AI құралдарын қалай пайдаланып жатқанына емес, жаңа технологиялар жағдайында қаржы инфрақұрылымының қалай өзгеретініне де бағытталады. Қазақстанда цифрлық қаржы сервистері қазірдің өзінде кең таралған. Енді банктер үшін негізгі мәселе — қызметтерді онлайн форматқа көшіру емес, AI-ды клиенттік тәжірибе, тәуекелдерді басқару, өнім жасау және ішкі процестердің бір бөлігіне айналдыру. AI & Digital Bridge 2026 қашан өтеді? AI & Digital Bridge 2026 форумы 1–3 қазан аралығында Астанадағы EXPO халықаралық көрме орталығында өтеді. 1 қазанда мемлекеттік органдар, халықаралық делегациялар және технологиялық индустрия өкілдеріне арналған арнайы бағдарлама ұйымдастырылады. Бұл күнге қатысу шақыру арқылы жүзеге асады. 2–3 қазанда форумның ашық бағдарламасы өтеді. Оған билет алған қонақтар қатыса алады. Форумның хедлайнерлері қатарында Network School негізін қалаушы Баладжи Шринивасан, Higgsfield AI компаниясының тең құрылтайшысы әрі CTO-сы Ерзат Дулат және Crimson Education тең құрылтайшысы әрі CEO-сы Джейми Битон бар. Шараны Қазақстан Республикасының Жасанды интеллект және цифрлық даму министрлігі, Astana Hub және Астана қаласының әкімдігі ұйымдастырады. Форум серіктестері мен демеушілері қатарында Freedom Bank, Kaspi Bank, «Самұрық-Қазына», «Қазақтелеком», Halyk Bank, Beeline Қазақстан, Yandex Qazaqstan, Freedom Telecom Operations және басқа компаниялар бар.