Құрылтайдың Цифрландыру, инновациялар және ғылым комитеті желтоқсанда өтетін тыңдауға дайындықты бастады. Комитет төрағасы Дархан Ахмедиевтің айтуынша, негізгі мақсат цифрландыру деңгейін бағалаумен шектелмей, экономиканың нақты салаларындағы мәселелерді шешуге мүмкіндік беретін технологиялар мен тиімді тетіктерді анықтау, деп хабарлайды Tech-news. «Цифрландырудың нәтижесі нақты болуы керек. Өндірісті ұлғайтуға, шығындарды азайтуға, кәсіпорындардың табысын арттыруға және экспорттық мүмкіндіктерін кеңейтуге бағытталған нақты жобалар қажет. Алдағы тыңдауда осы мәселелерді көтеріп қана қоймай, оларды шешудің нақты жолдарын ұсынуға тырысамыз», – деді Дархан Ахмедиев. Дайындық аясында бірнеше жұмыс тобы құрылады. Олардың құрамына бизнес өкілдері, ғалымдар, IT-мамандар және салалық сарапшылар кіріп, әр бағыттағы өзекті мәселелерді зерттейді. Сонымен бірге кәсіпорындар өз күшімен жүзеге асыра алатын жобалар, мемлекеттік қолдауды қажет ететін бастамалар және іске асуы үшін заңнамаға өзгерістер енгізу керек мәселелер жеке қарастырылады. Жұмыс топтарына шетелде тұратын және тиісті салаларда тәжірибесі бар қазақстандық мамандар да қатыса алады. Тыңдауға дайындық барысында 5–10 қазан аралығында азаматтар мен сарапшылар өз жобалары мен ұсыныстарын Құрылтайдың ресми сайты арқылы жібере алады. Ол үшін басты беттегі арнайы баннерді басып, тиісті бағыт бойынша жұмыс тобын таңдау қажет. 11 қазаннан бастап келіп түскен ұсыныстар бағыттар бойынша қаралып, жүйеленеді. Тыңдау Мемлекет басшысы жариялаған «Цифрландыру және жасанды интеллект жылы» аясында өтеді. Биыл 2029 жылға дейінгі «Digital Qazaqstan» ауқымды цифрландыру және жасанды интеллект технологияларын жаппай енгізу жөніндегі жалпыұлттық стратегиясы бекітілді. Стратегия экономика салаларына жасанды интеллектіні енгізуді, өндіріс пен басқа да негізгі секторларды технологиялық жаңғыртуды көздейді. Құрылтай тыңдауында осы міндеттерді нақты жобалар мен практикалық ұсыныстарға айналдыру мәселелері қарастырылмақ. Сообщение Құрылтай цифрландыру мен ЖИ бойынша жобалар мен ұсыныстар қабылдап жатыр появились сначала на Tech news.