NVIDIA негізін қалаушы әрі бас директоры Дженсен Хуанг 18 жастағы қазақстандықтарға кеңес берді, деп хабарлайды Kapital.kz іскерлік ақпарат орталығы. Дженсен Хуанг Қазақстанға алғаш рет жұмыс сапарымен келді. Астанада ол Қазақстанның премьер-министрінің орынбасары – жасанды интеллект және цифрлық даму министрі Жаслан Мәдиевпен fireside chat форматында сұхбат өткізді. Қонақтан егер сіз бүгінде Қазақстандағы 18 жастағы тұрғын болсаңыз, алдағы бес жылды қандай жұмысқа арнар едіңіз деп сұрады. NVIDIA негізін қалаушы әрі бас директоры технологиялардың әлемді қаншалықты жылдам өзгертіп жатқанын көре алатын қазіргі жас буынға қызығатынын айтты. Спикер өз буынының өкілдері компьютерлердің пайда болуының және одан кейінгі технологиялық дамудың куәгері болғанын атап өтті. Ал қазір жасанды интеллект одан арғы технологиялық дамудың негізі болып табылады. Және ол жастарға жасанды интеллектті (ЖИ) бағдарламалауды үйренуге кеңес береді. «Егер мен Қазақстандағы 18 жастағы тұрғын болғанымда, бар назарымды жасанды интеллект саласындағы ең үздік маман болуға арнар едім», – деді Дженсен Хуанг. Оның айтуынша, жасанды интеллект адамның көмекшісі әрі серіктесі бола алады, бірақ ол үшін оны барынша тиімді пайдалануды үйрену керек. «Жасанды интеллект саласындағы үздік маман ЖИ механизмінің қалай жұмыс істейтінін, оның принциптерін, күшті және әлсіз жақтарын, болашақта қалай дамитынын түсінуге тиіс», – деді қонақ. Бұған дейін inDrive компаниясы NVIDIA және Pony.ai компанияларымен өзара түсіністік туралы меморандумға (MoU) қол қойғаны хабарланған болатын. Бірлескен жоба үшін алғашқы нарық Қазақстан, ал роботаксиді іске қосу алаңы болып Астана қаласы таңдалды. Pony.ai жетінші буындағы роботаксиді (Gen-7) ұсынады, inDrive сапарларға тапсырыс беру платформасының жұмысы мен сервис ұйымдастыруды қамтамасыз етеді, ал NVIDIA бұл жобаға өзінің жасанды интеллект инфрақұрылымымен қолдау көрсетеді. Сондай-ақ Дженсен Хуанг Қазақстанға Премьер-министрдің орынбасары – жасанды интеллект және цифрлық даму министрі Жаслан Мәдиевтің шақыруымен келгені айтылған болатын. Бұл сапар Astana Hub қолдауымен өтіп жатқан және жасанды интеллект саласындағы мамандарды, әзірлеушілерді, стартаптарды, зерттеушілер мен технологиялық индустрия өкілдерін біріктіретін іс-шаралар сериясы – AI Month аясында ұйымдастырылғаны нақтыланды.